ភ្នំពេញ: ស្ត្រីវ័យក្មេងទាំងបីនាក់ដែលបានស្លាប់នៅទីក្រុងភ្នំពេញកាលពីសប្តាហ៍មុនបានផឹកស្រាអង្ករដែលមានជាតិមេតាណុលខ្ពស់។ នេះបើយោងតាមការវិភាគនៅមន្ទីរពិសោធន៍បានបង្ហាញពីសារធាតុមេតាណុលហួសកំរិតរហូតដល់ ៨៨ដង។

សាកសពជនរងគ្រោះពីរនាក់ក្នុងចំណោមជនរងគ្រោះទាំងបីនាក់ត្រូវបានរកឃើញនៅក្នុងបន្ទប់ជួលជិតផ្សារអ៊ីអន១ ក្នុងសង្កាត់ទន្លេបាសាក់ រាជធានីភ្នំពេញ។ ស្រី ផៃ ដែលត្រូវជាមិត្តភក្ដិរបស់ស្រី កា និង ថាវី បានចាកចេញទៅស្រុកណើតរបស់នាងបន្ទាប់ពីយប់ដែលពួកគេជួបជុំគ្នាផឹកស៊ី ហើយនាងក៏បានស្លាប់នៅទីនោះ។ ប៉ូលីសនិយាយថាពួកគេទាំង ៣ នាក់បានផឹកស្រាដែលមានស្លាកឈ្មោះថា “មាសហុង” ចំនួន ១១ដប កាលពីថ្ងៃអង្គារ ហើយចាប់ផ្តើមឈឺនៅថ្ងៃបន្ទាប់ រហូតដល់ព្រឹកថ្ងៃព្រហស្បតិ៍ ទី២ ខែកញ្ញា ឆ្នាំ២០២១ ពួកគេទាំង ៣នាក់ក៏បានស្លាប់។

ដបស្រាដែលផឹកនៅសល់ត្រូវបានរកឃើញនៅកន្លែងកើតហេតុហើយក្រុមការងារស្រាវជ្រាវបានរកឃើញពីវត្តមានរបស់មេតាណុលដែលជាសារធាតុគីមីមួយដែលមានតំលៃថោកនិងមានជាតិពុលខ្ពស់ប្រើដើម្បីបង្កើនជាតិអាល់កុលនិងប្រាក់ចំណេញ បច្ចុប្បន្នទីតាំងផលិតស្រានេះត្រូវបានក្រុមសម្ថតកិច្ចសង្កាត់បឹងកេងកងចុះបិទមិនឱ្យបន្តអាជីវកម្ម និងដាក់លក់ផលិតផលនេះទៀតទេ៕